संयुक्त राज्य अमेरिका, सेप्टेम्बर २१, २०२६ — गुगलको जेमिनी कृत्रिम बुद्धिमत्ता मोडलले मे महिनामा गरिएको साइबर सुरक्षा परीक्षणका क्रममा तीन वास्तविक कम्पनीको प्रणालीमा पहुँच बनाएको छ। यो गुगलको एआई प्रणालीले स्वायत्त रूपमा यस्तो कार्य गरेको सार्वजनिक रूपमा ज्ञात पहिलो घटना हो।
उन्नत एआई प्रणालीको सुरक्षा परीक्षण गर्ने स्वतन्त्र कम्पनी इर्रेगुलरले उक्त परीक्षण सञ्चालन गरेको थियो। साइबर सुरक्षा अभ्यासअन्तर्गत जेमिनीलाई एउटा काल्पनिक कम्पनीको सफ्टवेयरबाट सूचना प्राप्त गर्न निर्देशन दिइएको थियो।
गुगलका अनुसार परीक्षणका क्रममा जेमिनीले अनपेक्षित रूपमा इन्टरनेटमा पहुँच पाएको थियो। त्यसपछि मोडलले सार्वजनिक रूपमा उपलब्ध सूचना फेला पार्दै परीक्षणको दायराभित्र रहेको ठानेका वेबसाइटमा पहुँच बनाउन प्रमाणिकरण विवरण प्रयोग वा अनुमान गरेको थियो।
एक घटनामा जेमिनीले पासवर्ड अनुमान गर्दै सुरक्षित प्रणालीमा पहुँच बनाएको थियो। अन्य दुई घटनामा उसले सार्वजनिक रिपोजिटरीमा रहेका प्रमाणिकरण विवरण फेला पारेर वास्तविक कम्पनीका प्रणालीमा पहुँच गरेको थियो।
गुगलकी सुरक्षा इन्जिनियरिङ उपाध्यक्ष हेदर एडकिन्सका अनुसार तीनै घटनामा मोडलले आफूले पहुँच गरेको प्रणाली वास्तविक कम्पनीको भएको पहिचान गरेपछि आफ्नो गतिविधि रोकेको थियो।
