क्यालिफोर्निया, अमेरिका, १४ अगस्ट २०२६ — गुगलले जेमिनी ३.६ फ्ल्यास सार्वजनिक गरेको तीन सातामै जेमिनी ३.७ फ्ल्यास ल्याएको छ। कम्पनीले नयाँ मोडललाई कोडिङ र एआई एजेन्टका लागि हालसम्मकै सबैभन्दा सक्षम “कामदार” मोडलका रूपमा प्रस्तुत गरेको छ।
गुगलका अनुसार जेमिनी ३.७ फ्ल्यास डेभलपरबाट प्राप्त प्रतिक्रियासहित विभिन्न एल्गोरिदमिक सुधारको परिणाम हो। कम्पनीले यी सुधारहरू भविष्यमा आउने मोडलहरूमा समेत प्रयोग हुने जनाएको छ। जेमिनी ३.६ फ्ल्यासको तुलनामा नयाँ संस्करणले सफ्टवेयर इन्जिनियरिङ, ज्ञानमा आधारित काम र वेब डेभलपमेन्टमा सुधार ल्याएको छ।
सफ्टवेयर इन्जिनियरिङतर्फ जेमिनी ३.७ फ्ल्यासले डिबगिङ तथा समस्या समाधानजस्ता काममा अघिल्लो संस्करणभन्दा राम्रो प्रदर्शन गर्ने गुगलको दाबी छ। वेब डेभलपमेन्टमा यसले कम प्रम्प्टमै बढी कार्यक्षम लेआउट तथा सुविधासम्पन्न एप तयार गर्न सक्ने कम्पनीले जनाएको छ।
वित्त, कानुन र बायोसाइन्सजस्ता ज्ञानमा आधारित क्षेत्रमा पनि नयाँ मोडलले रिजनिङ क्षमता र शुद्धतामा सुधार गरेको गुगलले बताएको छ।
यसैबीच, यसै वर्षको सुरुवातमा सार्वजनिक गरिएको गुगलको २४ घण्टा सञ्चालन हुने एआई एजेन्ट जेमिनी स्पार्कले पनि आजदेखि जेमिनी ३.७ फ्ल्यास प्रयोग गर्ने भएको छ। गुगलका अनुसार नयाँ मोडलका कारण स्पार्क ज्ञानमा आधारित काममा अझ प्रभावकारी हुनुका साथै विभिन्न सीप आवश्यक पर्ने जटिल वर्कफ्लोमा यसको शुद्धता र आउटपुटको गुणस्तर सुधार हुनेछ।
