काठमाडौं, अक्टोबर २, २०२६ — राष्ट्रिय स्वतन्त्र पार्टी (रास्वपा)की सांसद अनुष्का श्रेष्ठले बालिकामाथिको जघन्य अपराध र महिलामाथिको हिंसाको बढ्दो समस्याबारे सरकारको ध्यानाकर्षण गराएकी छन्।
शुक्रबार प्रतिनिधिसभाको बैठकमा बोल्दै श्रेष्ठले यसअघि सदनमा उठाइएका बालिकामाथिको जघन्य अपराधका विषय र त्यसबारे सरकारले गर्नुपर्ने पहलको प्रगतिबारे प्रश्न गरिन्।
यसअघि तीन वर्षीय बालिकामाथि भएको बलात्कारको विषय सदनमा उठ्दा सरकारले देखाएको शीघ्र प्रतिक्रियाप्रति श्रेष्ठले आभार व्यक्त गरिन्।
सरकारका अगाडि धेरै जिम्मेवारी रहेको आफूले बुझेको बताउँदै उनले यो विषय प्राथमिकताबाट हराएको छैन भन्नेमा आफू विश्वस्त रहेको बताइन्।
‘यो विषय हाम्रो प्राथमिकताबाट हराएको छैन भन्नेमा म विश्वस्त छु। यसमा तयार भएको भनिएको अपेक्षित प्रतिवेदनमाथि के काम हुँदैछ, त्यो जान्न चाहन्छु,’ उनले भनिन्।
