काठमाडौं, अक्टोबर ६, २०२६ — गृहमन्त्री सुदन गुरुङले राज्यको गोप्य सूचना दुरुपयोग गर्ने जोसुकैलाई कानुनी दायरामा ल्याइने बताएका छन्।
मंगलबार फेसबुकमार्फत धारणा सार्वजनिक गर्दै गृहमन्त्री गुरुङले गृह मन्त्रालय र मातहतका निकायमा कार्यरत अधिकारी तथा कर्मचारीले आफ्नो पदको जिम्मेवारीलाई बेवास्ता गरी गोप्य वा संवेदनशील सूचना अनधिकृत व्यक्ति वा निकायलाई चुहाउने प्रवृत्ति आफूले लामो समयदेखि देखिरहेको बताएका छन्।
“राज्यको संवेदनशील सूचना कसैको निजी सम्पत्ति होइन, यो सार्वजनिक जिम्मेवारी हो। पदले सूचनामा पहुँच दिन्छ, तर त्यसको दुरुपयोग गर्ने अधिकार दिँदैन,” उनले लेखेका छन्।
मन्त्रालयमा प्राप्त हुने सानोभन्दा सानो सूचना, टिप वा गोप्य विवरणले भविष्यमा अपराध रोकथाम, अनुसन्धान अगाडि बढाउन वा कुनै गम्भीर घटनाको तथ्य स्थापित गर्न महत्वपूर्ण भूमिका खेल्न सक्ने उनले बताएका छन्।
राज्यले सुम्पिएको गोपनीयताविरुद्ध गएर देश र आफ्नो संगठनप्रतिको विश्वास जानाजान तोड्ने जोसुकैले उन्मुक्ति नपाउने र न्यायको दायरामा ल्याइने उनले स्पष्ट पारेका छन्।
