बारा, २४ अगस्ट २०२६ — बारामा ३ वर्षीया गरिमा चौधरीको बलात्कारपछि हत्या भएको घटनाका नाबालक आरोपीसँग सोधपुछ गरिएको भिडियो खिचेर सार्वजनिक गरेको आरोपमा एक प्रहरी जवान पक्राउ परेका छन्।
सोधपुछ कक्षभित्र खिचिएको भनिएको संवेदनशील भिडियो सामाजिक सञ्जालमा व्यापक रूपमा फैलिएपछि प्रहरीले जवान कुमारलाई पक्राउ गरी हिरासतमा लिएको हो।
जिल्ला प्रहरी कार्यालय बाराका प्रहरी उपरीक्षक नरेन्द्र कुँवरले पक्राउ परेका प्रहरी जवानविरुद्ध आपराधिक कानुनी प्रक्रिया अघि बढाउने तयारी भइरहेको जानकारी दिएका छन्।
भिडियो सार्वजनिक भएपछि प्रहरीले आन्तरिक अनुसन्धान थालेको थियो। अनुसन्धानका क्रममा भिडियो खिच्ने प्रहरी जवानले नै उक्त फुटेज सार्वजनिक गरेको हुन सक्ने देखिएपछि उनलाई पक्राउ गरिएको प्रहरीले जनाएको छ।
भिडियो खिचिएको समयमा सोधपुछ कक्षभित्र अन्य ५ जना प्रहरी कर्मचारी पनि उपस्थित रहेको प्रहरीले जनाएको छ। घटनामा उनीहरूको भूमिकाबारे समेत अनुसन्धान भइरहेको छ।
