सर्लाहीमा घरमै सुतिरहेका वृद्ध दम्पतीमाथि इँटा प्रहार, अवस्था गम्भीर

सर्लाही, नोभेम्बर १४, २०२६ — सर्लाहीको हरिपुर्वा नगरपालिका–९ बसन्तपुरमा घरमै सुतिरहेका वृद्ध दम्पतीमाथि अज्ञात समूहले इँटा प्रहार गर्दा दुवै जना गम्भीर घाइते भएका छन्।

आक्रमणबाट घाइते हुनेमा ७० वर्षीय शुकदेव साह र उनकी श्रीमती जिब्छी साह रहेका छन्। उनीहरूलाई सुतिरहेको अवस्थामा आक्रमणकारीले टाउको र अनुहारमा इँटाले प्रहार गरेको बताइएको छ।

जिल्ला प्रहरी कार्यालय सर्लाहीका प्रहरी नायब उपरीक्षक वेदप्रसाद गौतमले घटनाबारे जानकारी पाएलगत्तै प्रहरी टोली घटनास्थलतर्फ पठाइएको बताए।

‘दम्पतीमाथि सुतिरहेको अवस्थामा अज्ञात समूहले आक्रमण गरेको भन्ने जानकारी आएको छ। प्रहरी टोली घटनास्थलतर्फ गइसकेको छ। अनुसन्धानपछि मात्रै दम्पतीमाथि कसले र किन आक्रमण गरेको हो भन्ने खुल्ने छ,’ गौतमले अनलाइनखबरसँग भने।

किराना पसल सञ्चालन गर्दै आएका साह दम्पतीको हाल जनकपुरस्थित प्रादेशिक अस्पतालमा उपचार भइरहेको छ। स्थानीय रविन्द्र यादवका अनुसार दुवै जनाको अवस्था गम्भीर छ।

आक्रमणको कारण भने अहिलेसम्म खुल्न सकेको छैन। हरिपुर्वा नगरपालिका–८ का वडाध्यक्ष रमेश यादवले पनि दम्पतीमाथि आक्रमण हुनुको कारण पत्ता नलागेको बताए।