पोखरा, सेप्टेम्बर २१, २०२६ — पोखराको पद्म नर्सिङ होमलाई शय्या स्तरवृद्धिको अनुमति दिने क्रममा घुस बार्गेनिङ गरेको आरोप लागेपछि गण्डकी प्रदेश सरकारले छानबिन समिति गठन गरेको छ।
प्रदेश सरकारले स्वास्थ्य मन्त्रालयका सचिव डा. युवानिधि बसौलालाई जिम्मेवारीबाट हटाएर मुख्यमन्त्री तथा मन्त्रिपरिषद्को कार्यालयमा काज सरुवा गरेको छ। अस्पतालको स्तरवृद्धि अनुमति दिने क्रममा अनियमितता भएको भन्दै निवर्तमान स्वास्थ्य मन्त्री, सचिव र मन्त्रालयका कर्मचारीहरूको नाम जोडिएपछि प्रदेश मन्त्रिपरिषद्ले यस्तो निर्णय गरेको हो।
प्रदेश सरकारका प्रवक्ता तथा आर्थिक मामिला मन्त्री जितबहादुर शेरचनले घटनाबारे छानबिन गर्ने निर्णय भएको बताए।
शेरचनका अनुसार स्वास्थ्य मन्त्रालयबाट पछिल्लो दुई वर्षमा प्रदान गरिएका अनुमति वा अस्पतालको स्तरवृद्धिसम्बन्धी कानुनी व्यवस्था र अभ्यासलगायतका विषयमा छानबिन गरी १५ दिनभित्र प्रतिवेदन पेस गर्न मुख्यमन्त्री तथा मन्त्रिपरिषद्को कार्यालयका उपसचिवको संयोजकत्वमा तीन सदस्यीय छानबिन समिति गठन गरिएको छ।
प्रदेश सरकारले अस्पताल स्तरवृद्धि प्रकरणको थप छानबिनका लागि अख्तियार दुरुपयोग अनुसन्धान आयोगको पोखरास्थित कार्यालयमा पत्राचार गर्ने निर्णय पनि गरेको छ।
