काठमाडौं, अक्टोबर १७, २०२६ — जल तथा मौसम विज्ञान विभागका अनुसार आज कोशी, बागमती र गण्डकी प्रदेशका हिमाली क्षेत्रमा सामान्यतया बदली रहनेछ।
देशका अन्य हिमाली क्षेत्रमा आंशिक बदली हुने सम्भावना छ। देशभरका पहाडी क्षेत्रमा पनि आंशिक बदली रहनेछ। मधेश, कोशी, बागमती र गण्डकी प्रदेशका तराई क्षेत्रमा समेत आंशिक बदली हुने विभागले जनाएको छ।
यसैगरी, लुम्बिनी र सुदूरपश्चिम प्रदेशका तराई क्षेत्रमा मौसम मुख्यतया सफा रहने अनुमान गरिएको छ।
कोशी, बागमती र गण्डकी प्रदेशका पहाडी क्षेत्रका एक-दुई स्थानमा तथा हिमाली क्षेत्रमा मेघगर्जन र चट्याङसहित हल्का वर्षा तथा हिमपातको सम्भावना रहेको विभागले जनाएको छ।
आज राति हिमाली क्षेत्रमा आंशिक बदली रहनेछ। कोशी, बागमती, गण्डकी र लुम्बिनी प्रदेशका पहाडी क्षेत्रमा पनि आंशिक बदली हुने सम्भावना छ भने अन्य पहाडी क्षेत्रमा मौसम मुख्यतया सफा रहनेछ।
