केरुङ, चीन, २६ अगस्ट २०२६ — नेपालको रसुवा जिल्लामा विनाशकारी आकस्मिक बाढी आएको केही घण्टापछि बुधबार बिहान दक्षिणपश्चिम चीनको सिजाङ स्वायत्त क्षेत्रमा पर्ने ग्यिरोङ सीमा बन्दरगाहमा पहिरो गएपछि चिनियाँ राष्ट्रपति सी चिनफिङले व्यापक खोज तथा उद्धार अभियान सञ्चालन गर्न निर्देशन दिएका छन्।
यस विपद्बाट चीन–नेपाल सीमा क्षेत्रका दुवैतर्फ जनधन तथा भौतिक संरचनामा ठूलो क्षति पुगेको छ भने मानिसहरू बेपत्ता भएका छन्।
सीले बेपत्ता मानिसहरूको खोजी तथा उद्धार, घाइतेको उपचार र मानवीय तथा भौतिक क्षति न्यून गर्न सबै सम्भावित प्रयास गर्न सम्बन्धित निकायलाई निर्देशन दिएका छन्। उनले थप विपद् हुन नदिन निगरानी, पूर्वसूचना प्रणाली र आपत्कालीन प्रतिकार्यलाई थप प्रभावकारी बनाउन पनि निर्देशन दिएका छन्।
चिनियाँ सरकारले खोज, उद्धार तथा राहत कार्यका लागि आपत्कालीन प्रतिक्रिया निकायहरू परिचालन गरेको छ। चिनियाँ उपप्रधानमन्त्री चाङ क्विङ पनि सीमा नजिकको केरुङ पुगेका छन्। उनले प्रभावित क्षेत्रको निरीक्षण गर्नुका साथै चीनको उद्धार तथा विपद् व्यवस्थापन कार्यको नेतृत्व र अनुगमन गरिरहेका छन्। उनीसँग सम्बन्धित सरकारी अधिकारीहरू पनि पुगेका छन्।
नेपालीतर्फ रसुवागढी भनेर चिनिने ग्यिरोङ बन्दरगाह आसपास पहिरो गएको हो। पहिरोले बन्दरगाहतर्फ जाने सडकमा क्षति पुर्याएको छ भने ड्रोनबाट खिचिएको दृश्यमा सीमा क्षेत्रमा रहेका केही भवनहरू माटो तथा भग्नावशेषले पुरिएको देखिएको छ।
