वासिङ्टन, अमेरिका, सेप्टेम्बर २४, २०२६ — अमेरिकी राष्ट्रपति डोनाल्ड ट्रम्पले चिनियाँ राष्ट्रपति सी चिनफिङलाई बुधबार जोइन्ट बेस एन्ड्र्युजमा व्यक्तिगत रूपमा स्वागत गरेका छन्। व्यापार, प्रविधि, ताइवान र इरानका विषयमा तनाव कायम रहेका बेला सी तीनदिने राजकीय भ्रमणका लागि अमेरिका पुगेका हुन्।
चिनियाँ राष्ट्रपति सी र उनकी पत्नी पेङ लियुआनलाई मेरील्यान्डस्थित वासिङ्टननजिकको सैन्य विमानस्थलमा ट्रम्प र प्रथम महिला मेलानिया ट्रम्पले स्वागत गरेका थिए। सी विमानबाट ओर्लिएपछि दुवै देशका नेताले हात मिलाउँदै केहीबेर कुराकानी गरेका थिए। सो क्रममा सैन्य ब्याण्ड र औपचारिक सम्मानको व्यवस्था गरिएको थियो।
जोइन्ट बेस एन्ड्र्युजमा सीलाई व्यक्तिगत रूपमा स्वागत गर्ने ट्रम्पको निर्णय सामान्य प्रोटोकलभन्दा फरक थियो। रोयटर्सका अनुसार ११ वर्षपछि पहिलो पटक अमेरिकी राष्ट्रपतिले उक्त सैन्य विमानस्थलमा विदेशी नेताको व्यक्तिगत रूपमा स्वागत गरेका हुन्।
सेप्टेम्बर २३ देखि २५ सम्म हुने यो भ्रमण करिब तीन वर्षपछि सीको पहिलो अमेरिका भ्रमण हो भने एक दशकभन्दा बढी समयपछि वासिङ्टनको पहिलो राजकीय भ्रमण हो। ह्वाइट हाउसका अनुसार बिहीबार ट्रम्प र मेलानिया ट्रम्पले सी र पेङलाई ह्वाइट हाउसमा औपचारिक स्वागत समारोह तथा राजकीय रात्रिभोजमा सहभागी गराउने कार्यक्रम छ।
दुई देशबीचको व्यापार पनि भ्रमणका प्रमुख विषयमध्ये एक हो। अमेरिकी अर्थमन्त्री स्कट बेसेन्टले नोभेम्बर १० मा सकिन लागेको अमेरिका–चीन व्यापार समझदारीलाई जनवरी १० सम्म थप गर्ने सहमति भएको बताएका छन्।
