एसियाको आर्थिक, डिजिटल र रणनीतिक ‘ब्रिज’ बन्नुपर्ने परराष्ट्रमन्त्री खनालको भनाइ

न्युयोर्क, अमेरिका, सेप्टेम्बर २५, २०२६ — एसियाको बढ्दो आर्थिक तथा रणनीतिक प्रभावका बीच नेपालको भौगोलिक अवस्थालाई अवसरमा रूपान्तरण गर्दै नेपाललाई एसियाको आर्थिक, डिजिटल र रणनीतिक ‘ब्रिज’ का रूपमा अघि बढाउनुपर्ने परराष्ट्रमन्त्री शिशिर खनालले बताएका छन्।

न्युयोर्कमा एसिया सोसाइटीद्वारा शुक्रबार आयोजित ‘स्टिरिङ नेपाल्स फ्युचर इन एसियाज राइजिङ सेन्चुरी’ अर्थात् ‘एसियाको उदाउँदो शताब्दीमा नेपालको भविष्यको मार्गदर्शन’ विषयक कार्यक्रममा सम्बोधन गर्दै खनालले नेपालले आफ्नो भौगोलिक अवस्थालाई राष्ट्रिय आकाङ्क्षाको सीमाका रूपमा लिन नहुने बताए।

परराष्ट्रमन्त्रीको निजी सचिवालयका अनुसार खनालले नेपाललाई परम्परागत रूपमा ‘सानो मुलुक’ का रूपमा हेर्ने दृष्टिकोण परिवर्तन गर्नुपर्नेमा जोड दिँदै नेपाल रणनीतिक रूपमा महत्वपूर्ण स्थानमा रहेको बताए।

‘नेपाल सानो होइन। नेपाल रणनीतिक रूपमा सही स्थानमा छ,’ खनालले भने, ‘हाम्रा छिमेकीको आकार भूगोलको यथार्थ हो, तर त्यो हाम्रो महत्त्वाकाङ्क्षाको सीमा कहिल्यै बन्नु हुँदैन।’

खनालले नेपालको भूगोल र जनसङ्ख्यालाई अन्य मुलुकसँग तुलना गर्दै नेपाललाई आकारका आधारमा मात्र सानो मुलुकका रूपमा बुझ्न नहुने धारणा राखे।

हालैको बाढीको प्रसङ्ग उल्लेख गर्दै परराष्ट्रमन्त्री खनालले त्यसलाई ‘हिमालयन सुनामी’ को संज्ञा दिए।

‘नेपालले लामो समयदेखि प्राकृतिक विपत्ति, कठिन भूगोल र संरचनात्मक चुनौती सामना गर्दै आएको छ,’ उनले भने।

पछिल्लो विपत्तिले जलवायु परिवर्तनलाई नेपालको परराष्ट्र नीतिको रणनीतिक प्राथमिकताका रूपमा लिनुपर्ने स्पष्ट सन्देश दिएको खनालले बताए।

उनले प्रभावकारी पूर्वसूचना प्रणाली, जलसम्बन्धी तथ्याङ्क आदानप्रदान, पूर्वानुमानयोग्य अनुदानमा आधारित जलवायु वित्त तथा छिमेकी र अन्तर्राष्ट्रिय समुदायसँग व्यावहारिक सहकार्यलाई प्राथमिकता दिनुपर्ने उल्लेख गरे।

खनालले एसियाको उदयलाई नेपालका लागि महत्वपूर्ण अवसरका रूपमा व्याख्या गर्दै विश्वको करिब ६० प्रतिशत जनसङ्ख्या एसियामा रहेको र विश्व अर्थतन्त्रमा एसियाको ठूलो योगदान रहेको बताए।