कसिब मर्डोकविरुद्ध रविन्द्र धान्त: यूएफसीको बाटोमा बहुप्रतीक्षित सेमिफाइनल भिडन्त

यो भिडन्तमा प्रतिस्पर्धात्मक पक्षसँगै मर्डोकका टिप्पणीले पनि चर्चा थपेको छ। जुनमा हेभीडब्ल्यूजीटी एमएमएसँगको अन्तर्वार्तामा उनले धान्त, नेपाल र आगामी भिडन्तबारे कुरा गरेका थिए। उक्त कुराकानीमा उनीहरूबीचको खेल, तयारी तथा धान्तको लामो दूरीसँग कसरी सामना गर्ने भन्ने विषयमा समेत चर्चा भएको थियो।

मर्डोकले भिडन्तको प्रचारात्मक पक्षलाई थप चर्काउँदै आफूले धान्तलाई छिट्टै पराजित गर्ने दाबी गरेका छन्। उनले धान्तलाई हराएपछि नेपाली समर्थकसँग व्यंग्यात्मक रूपमा माफी माग्ने र पछि नेपाली समर्थकलाई आफ्नो पक्षमा ल्याउने योजना रहेको बताएका छन्। उनले नेपाली समर्थकलाई निराश पार्ने दाबीसमेत गरेका छन्।

धान्तका लागि भने यो खेल व्यक्तिगत प्रतिस्पर्धाभन्दा धेरै ठूलो अवसर हो। जित हात पारेमा उनी रोड टु यूएफसीको फाइनलमा पुग्नेछन् र प्रतियोगिता जित्दै यूएफसीको आधिकारिक सम्झौता प्राप्त गर्ने पहिलो नेपाली खेलाडी बन्ने सम्भावनाबाट एक खेल मात्र टाढा रहनेछन्। प्रारम्भिक चरणको जितसँगै उनले यसअघि नै रोड टु यूएफसीमा खेल जित्ने पहिलो नेपाली खेलाडीको इतिहास बनाइसकेका छन्।

धान्तप्रतिको नेपाली समर्थकको उत्साह मकाउमा भएको उनको पहिलो खेलमै देखिएको थियो। मकाउ र हङकङमा रहेका सयौँ नेपाली समर्थक खेल हेर्न पुगेका थिए। नेपालमा समेत विभिन्न स्थानमा उनको खेलको प्रत्यक्ष प्रसारण हेर्न सामूहिक कार्यक्रम आयोजना भएका थिए। उनको जितले नेपाली मिश्रित मार्सल आर्ट्सप्रतिको बढ्दो रुचिलाई समेत उजागर गरेको थियो।

अर्कोतर्फ, मर्डोक धान्तका लागि प्रतियोगितामा अहिलेसम्मकै कठिन प्रतिद्वन्द्वीमध्ये एक मानिन्छन्। उनी अपराजित कीर्तिमानसहित रोड टु यूएफसीमा आएका थिए र ब्यान्टमवेट समूहका प्रमुख दाबेदारमध्ये एकका रूपमा हेरिएका थिए। मिनामीविरुद्धको खेलमा उनले प्रारम्भिक प्रतिरोधपछि दूरी घटाएर कुस्तीमा आधारित खेलमार्फत लगातार नियन्त्रण कायम गर्न सक्ने क्षमता देखाएका थिए।

धान्तसँग भने फरक प्रकारका चुनौती सिर्जना गर्ने क्षमता छ। उनको प्रहार र ग्र्याप्लिङबीच परिवर्तन गर्न सक्ने क्षमता, उचाइको फाइदा तथा उच्च फिनिसिङ दरले मर्डोकलाई आफ्नो खेल सहज रूपमा लागू गर्न कठिन बनाउन सक्छ। अलिन्टोजोनविरुद्धको खेलमा समेत धान्तले ग्र्याप्लिङबाट माउन्ट पोजिसनमा पुगेर ग्राउन्ड एन्ड पाउन्डमार्फत खेल टुंग्याएका थिए।

त्यसैले यो भिडन्तको मुख्य रणनीतिक प्रश्न मर्डोकले धान्तको लामो दूरीभित्र प्रवेश गरेर आफ्नो कुस्ती र ग्र्याप्लिङ लागू गर्न सक्छन् कि सक्दैनन् भन्ने हुनेछ। अर्कोतर्फ, धान्तले आफ्नो उचाइ, प्रहार र फिनिसिङ क्षमताको उपयोग गर्दै मर्डोकलाई नजिक आउँदा क्षति पुर्‍याउन सके खेलको दिशा फरक हुन सक्छ।

ब्यान्टमवेटको अर्को सेमिफाइनलमा भारतका चुन्ग्रेङ कोरेन र जापानका र्यो ताजिमाबीच प्रतिस्पर्धा हुनेछ। धान्त र कोरेन दुवै फाइनलमा पुगेमा उनीहरूबीच पुनः भिडन्त हुने सम्भावना पनि रहनेछ। धान्तले सन् २०२५ मा कोरेनलाई पराजित गरिसकेका छन्।

अपराजित न्युजिल्यान्डेली मर्डोकले नेपाली समर्थकलाई चुप गराउने दाबी गरिरहेका छन् भने धान्त आफ्नो देशबाट यूएफसीसम्म पुग्ने ऐतिहासिक यात्रालाई अर्को चरणमा लैजाने लक्ष्यमा छन्। त्यसैले अगस्ट २८ को यो सेमिफाइनल केवल अर्को प्रतियोगितात्मक खेलमा सीमित छैन। यो दुई फरक शैली, दुई बलिया फिनिसर र यूएफसीको ढोकाबाट एक कदम मात्र टाढा रहेका दुई खेलाडीबीचको निर्णायक भिडन्त बन्नेछ।