काठमाडौं, २३ अगस्ट २०२६ — नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवा आइतबार काठमाडौंको चुनदेवीस्थित पार्टीको सम्पर्क कार्यालय पुगेका छन्। पार्टीको सभापति पदमा औपचारिक रूपमा नरहे पनि उनी ‘सभापति शेरबहादुर देउवा’ लेखिएको नेमप्लेट राखिएको डेस्कमा बसेका थिए।
नेपाली कांग्रेसनिकट आदिवासी जनजाति महासंघले कार्यालयमा आयोजना गरेको चियापान कार्यक्रममा सहभागी हुन देउवा त्यहाँ पुगेका हुन्। करिब ५ महिनासम्म सिंगापुर र हङकङमा उपचार गराएर नेपाल फर्किएपछि चुनदेवीस्थित कार्यालयमा उनको यो दोस्रो भ्रमण हो।
देउवा १२ अगस्टमा नेपाल फर्किएका थिए र स्वदेश फर्केकै दिन उक्त कार्यालय पुगेका थिए।
कांग्रेसको १५औं महाधिवेशनको तयारीका लागि देउवा पक्षले चुनदेवीमा उक्त सम्पर्क कार्यालय स्थापना गरेको हो। कार्यालयमा देउवाका लागि छुट्टै कोठासमेत व्यवस्था गरिएको छ। कोठाबाहिर ‘सभापति शेरबहादुर देउवा’ लेखिएको बोर्ड राखिएको छ भने देउवा बस्ने मुख्य डेस्कमा समेत सोही पद उल्लेख गरिएको नेमप्लेट राखिएको छ।
ऊर्जा राज्यमन्त्री भइसकेका पूर्णबहादुर तामाङले १४ अगस्टमा आयोजित राष्ट्रिय भेलामा आफूले अन्य पार्टी नेताहरूलाई जानकारी नदिई उक्त नेमप्लेट राखेको बताएका थिए।
