चितवनमा तीन महिनामा ३ हजार ६२ जनाले वंशजका आधारमा नागरिकता पाए

चितवन, अक्टोबर २५, २०२६ — चितवनमा चालु आर्थिक वर्षको साउनदेखि असोज मसान्तसम्म ३ हजार ६२ जनाले वंशजका आधारमा नागरिकता प्राप्त गरेका छन्। यस अवधिमा ६ हजार ७६६ नागरिकताको प्रतिलिपि जारी गरिएको छ भने २८ जनाले नागरिकता परित्याग गरेका छन्।

जिल्ला प्रशासन कार्यालय चितवन र इलाका प्रशासन कार्यालय माडीबाट नागरिकता जारी गरिएको हो। जिल्ला प्रशासन कार्यालयका सूचना अधिकारी विकास विकका अनुसार जिल्ला प्रशासन कार्यालयबाट २ हजार ८२४ र माडीबाट २३८ जनाले वंशजका आधारमा नागरिकता लिएका छन्।

जिल्ला प्रशासन कार्यालयबाट नागरिकता लिनेमा १ हजार ४१८ महिला र १ हजार ४०६ पुरुष छन्। माडीबाट नागरिकता लिनेमा १२२ महिला र ११६ पुरुष रहेका छन्।

तीन महिनाको अवधिमा जिल्ला प्रशासन कार्यालयबाट १५ महिलाले वैवाहिक अङ्गीकृत नागरिकता र ११ जनाले अङ्गीकृत नागरिकता प्राप्त गरेका छन्। अङ्गीकृत नागरिकता लिनेमा सात महिला र चार पुरुष छन्। यसै अवधिमा नौ महिला र २२ पुरुषसहित ३१ जनाले गैरआवासीय नेपाली नागरिकता प्राप्त गरेका छन्। माडीबाट एक महिलाले वैवाहिक अङ्गीकृत नागरिकता र एक जनाले अङ्गीकृत नागरिकता लिएका छन्।

यस अवधिमा जारी गरिएका ६ हजार ७६६ नागरिकताको प्रतिलिपिमध्ये जिल्ला प्रशासन कार्यालयबाट ६ हजार ११६ र माडीबाट ६५० वटा जारी भएका छन्। जिल्ला प्रशासन कार्यालयबाट प्रतिलिपि लिनेमा २ हजार ९८७ महिला, ३ हजार १२८ पुरुष र अन्य लैङ्गिक समूहमा अभिलेख भएका एक जना छन्। माडीबाट प्रतिलिपि लिनेमा ३२३ महिला र ३२७ पुरुष छन्।

जिल्ला प्रशासन कार्यालयबाट २८ जनाले नागरिकता परित्याग गरेका छन्। नागरिकता परित्याग गर्नेमा १० महिला र १८ पुरुष छन्। यसै अवधिमा चार जनाको नागरिकता रद्द गरिएको छ।

तीन महिनामा जिल्ला प्रशासन कार्यालयबाट राष्ट्रिय परिचयपत्रका लागि ११ हजार ९९७ जनाको नयाँ विवरण दर्ता गरिएको छ भने ४ हजार ३७० वटा परिचयपत्र वितरण गरिएको सूचना अधिकारी विकले जानकारी दिए। राहदानीका लागि ५ हजार ८५२ जनाको सिफारिस गरिएको र ४ हजार २४३ वटा राहदानी वितरण गरिएको उनले बताए।

यस अवधिमा ३२६ जनाको नाबालक परिचयपत्रका लागि नयाँ विवरण दर्ता गरिएको र ११ वटा प्रतिलिपि जारी गरिएको छ। कार्यालयबाट ३१६ वटा जातीय प्रमाणित, ३१७ वटा भारतीय पेन्सन सिफारिस, १२५ वटा व्यक्ति प्रमाणित र १ हजार ११४ वटा अन्य सिफारिससम्बन्धी काम भएका छन्।