सुरुङ उद्धार विज्ञ अर्नोल्ड डिक्सले भने—नेपालको बाढी उद्धार मेरो करियरकै अभूतपूर्व चुनौती

रसुवा, सेप्टेम्बर ७, २०२६ — अष्ट्रेलियाली सुरुङ उद्धार विज्ञ अर्नोल्ड डिक्सले नेपालमा भोटेकोशी बाढीपछि जारी खोज तथा उद्धार अभियानलाई आफ्नो करियरमा यसअघि कहिल्यै सामना नगरेको चुनौतीपूर्ण अवस्था बताएका छन्। उनका अनुसार उद्धार टोलीले एउटै नभई विभिन्न स्थानमा एकैसाथ सम्भावित उद्धार अभियान सञ्चालन गर्नुपर्ने जटिल परिस्थितिको सामना गरिरहेका छन्।

सन् २०२३ मा भारतको सिल्क्यारा सुरुङमा फसेका ४१ कामदारको सफल उद्धारमा महत्वपूर्ण भूमिका खेलेपछि अन्तर्राष्ट्रिय रूपमा परिचित डिक्सले सोमबार बिहान सामाजिक सञ्जालमार्फत नेपालमा भइरहेको उद्धार अभियानबारे आफ्नो अनुभव सार्वजनिक गरेका हुन्।

“अहिले नेपालमा हामीले यसअघि कहिल्यै सामना नगरेको अवस्था सामना गरिरहेका छौँ,” उनले लेखेका छन्। “एउटा मात्र उद्धार होइन, विभिन्न स्थानमा एकैसाथ सम्भावित धेरै उद्धार अभियान चलिरहेका छन्, जसका आ-आफ्नै खतरा, अनिश्चितता र अझै बचाउन सकिने जीवनहरू छन्।”

विनाशकारी बाढीपछि भोटेकोशी र त्रिशूली नदी आसपासका विभिन्न प्रभावित क्षेत्रमा खोज तथा उद्धार अभियान जारी छ। स्थानीय तथा अन्तर्राष्ट्रिय उद्धार टोलीहरू कठिन र जोखिमपूर्ण परिस्थितिमा प्रभावित तथा पहुँचविहीन स्थानसम्म पुग्ने प्रयास गरिरहेका छन्।

डिक्सले नेपालको वर्तमान अवस्थालाई सिल्क्यारा सुरुङ उद्धार अभियानसँग तुलना गर्दै त्यहाँ एउटा मात्र तर अत्यन्त जटिल भूमिगत उद्धार अभियानमा सम्पूर्ण ध्यान केन्द्रित गर्न सकिएको बताए।

तर नेपालमा भने एकै समयमा विभिन्न स्थानमा सम्भावित उद्धारको आवश्यकता देखिएकाले चुनौती फरक रहेको उनको भनाइ छ। उद्धारकर्मीहरूले सम्भावित जीवित व्यक्तिको अवस्थाबारे अनिश्चितताबीच विभिन्न जोखिमपूर्ण स्थलमा एकसाथ काम गर्नुपरेको छ।

बाढीको व्यापक प्रभावबारे चर्चा गर्दै डिक्सले पूर्वीय दर्शनको ‘धर्म’ अवधारणासमेत उल्लेख गरेका छन्। उनले परिणाम निश्चित नभए पनि सही कर्तव्यबाट पछि नहट्नु नै महत्वपूर्ण हुने बताएका छन्।

“परीक्षा केवल हामी सफल हुन्छौँ वा हुँदैनौँ भन्ने होइन,” उनले लेखेका छन्। “बाटो अझ कठिन बन्दै जाँदा, जिम्मेवारी बढ्दै जाँदा र परिणामबारे निश्चित हुन नसक्दा पनि हामीले सही कामलाई निरन्तरता दिन सक्छौँ कि सक्दैनौँ भन्ने नै वास्तविक परीक्षा हो।”

डिक्सले सिल्क्यारा सुरुङ उद्धार अभियानबाट आफूले सम्भावना कम हुनु र कुनै कुरा असम्भव हुनु फरक विषय भएको पाठ सिकेको बताएका छन्।