जेन–जी आन्दोलनको एक वर्षपछि पुरानै लयमा फर्किंदै भाटभटेनी

काठमाडौं, ८ सेप्टेम्बर २०२६ — जेन–जी आन्दोलनका क्रममा आगजनी, तोडफोड र लुटपाटबाट ठूलो क्षति व्यहोरेको भाटभटेनी सुपरमार्केट आन्दोलनको एक वर्षपछि बिस्तारै पुरानै लयमा फर्किने प्रयासमा जुटेको छ।

देशभर रहेका भाटभटेनीका २८ वटा स्टोरमध्ये १२ वटा आगजनीबाट प्रभावित भएका थिए भने ९ वटा स्टोरमा तोडफोड र लुटपाट भएको थियो। कुल २१ वटा प्रभावित स्टोरमध्ये हालसम्म १७ वटा पुनः सञ्चालनमा आएका छन्।

तोडफोड र लुटपाट भएका सबै ९ वटा शाखा यसअघि नै सञ्चालनमा आइसकेका छन्। आगजनीबाट क्षतिग्रस्त भएका १२ वटा शाखामध्ये ८ वटा पुनः सञ्चालनमा ल्याइएको छ।

सुनसरीको धरान, काठमाडौंको नक्साल, मकवानपुरको हेटौंडा र झापाको दमक शाखा भने पुनः सञ्चालनको तयारीमा रहेका छन्। भाटभटेनीले यी शाखाहरू असोज मसान्तभित्र पुनः सञ्चालनमा ल्याउने योजना बनाएको छ।

आन्दोलनका क्रममा काठमाडौं उपत्यकाभित्र महाराजगन्ज, बौद्ध, कोटेश्वर, बालुवाटार वेयरहाउस र नक्साल शाखामा आगजनी भएको थियो। उपत्यका बाहिर पोखरा, चितवन, हेटौंडा, बिर्तामोड, दमक, विराटनगर र धरान शाखा पनि आगजनीबाट क्षतिग्रस्त भएका थिए।

त्यस्तै, कलंकी, ठिमी, बालाजु, जनकपुर, बुटवल, वीरगन्ज, धनगढी, इटहरी र भैरहवा शाखामा तोडफोड तथा लुटपाट भए पनि आगजनी भएको थिएन।

टोखा, सातदोबाटो, अनामनगर, सानो गाउँ, वर्ल्ड ट्रेड सेन्टर, पाटन र नेपालगन्जस्थित स्टोर भने आन्दोलनका क्रममा सुरक्षित रहेका थिए।

आन्दोलनपछि कम्पनीले क्षतिग्रस्त शाखाहरूको पुनर्निर्माण र पुनःस्थापनालाई प्राथमिकता दिँदै आफ्नो व्यापारिक गतिविधिलाई सामान्य अवस्थामा फर्काउने प्रयास गरिरहेको छ।

जेन–जी आन्दोलनले भाटभटेनीको भौतिक पूर्वाधारमा ठूलो क्षति पुर्‍याउनुका साथै वित्तीय व्यवस्थापन र व्यवसाय विस्तार योजनामा समेत तत्काल दबाब सिर्जना गरेको थियो। तर एक वर्षको अवधिमा कम्पनीले बिस्तारै नियमित व्यावसायिक गतिविधिलाई पुनः गति दिन थालेको छ।

पुनर्निर्माण र पुनःस्थापनासँगै भाटभटेनीले आफूलाई ‘अन्तर्राष्ट्रिय मोडल’ अनुसार सञ्चालन गर्ने योजनासमेत अघि बढाएको छ। सोही योजनाअन्तर्गत कम्पनीले भक्तपुरको राधेराधेस्थित शाखाबाट रात्रिकालीन सेवा पनि सुरु गरेको छ।