क्यालिफोर्निया, अमेरिका, सेप्टेम्बर २१, २०२६ — एनभिडियाका सीईओ जेन्सन ह्वाङले आगामी दशकभित्र आर्टिफिसियल इन्टेलिजेन्स (एआई) का कारण मानव अस्तित्व समाप्त हुन सक्ने चेतावनीलाई खारेज गर्दै सन् २०३० सम्ममा एआईका कारण संसार अन्त्य हुने सम्भावना शून्य रहेको बताएका छन्।
सान्ता क्लारास्थित एनभिडियाको मुख्यालयमा सीबीएस न्युजसँगको अन्तर्वार्तामा ह्वाङले यस्तो धारणा राखेका हुन्। अत्यधिक क्षमतायुक्त एआई प्रणालीको सुरक्षा र विकासको गतिबारे बहस तीव्र भइरहेका बेला उनले तत्काल एआई विपत्तिको भविष्यवाणी गरेर मानिसलाई डराउनु अनावश्यक र गैरजिम्मेवारपूर्ण भएको बताए।
ह्वाङको भनाइ पूर्व एन्थ्रोपिक शोधकर्ता ज्याकब कक्सनले यसै महिनाको सुरुवातमा दिएको चेतावनीपछि आएको हो। कक्सनले एआई विकासमा संलग्न मानिसहरूले दशकको अन्त्यसम्ममा एआईले सबै मानिसको ज्यान लिन सक्ने विश्वास गरिरहेको बताएका थिए। उनको भनाइपछि एआई सुरक्षासम्बन्धी बहस फेरि तीव्र भएको थियो।
एन्थ्रोपिकका सीईओ डारियो अमोदेई र ओपनएआईका सीईओ साम अल्टम्यानसहित प्रविधि क्षेत्रका केही प्रमुखहरूले एआई विकासको गतिमा थप सावधानी अपनाउनुपर्ने बताएका छन्। तर ह्वाङले एआई विकासलाई सकेसम्म तीव्र रूपमा अघि बढाउनुपर्ने बताउँदै कम्पनीहरूले उत्पादन बजारमा ल्याउनुअघि त्यसको सुरक्षा सुनिश्चित गर्नुपर्ने धारणा राखेका छन्।
एआई सुरक्षाका विषयमा एनभिडियाको हितबारे सोधिएको प्रश्नमा ह्वाङले कम्पनीको व्यावसायिक सफलता आफ्ना उत्पादन र सेवाको सुरक्षित प्रयोगसँग प्रत्यक्ष जोडिएको बताए। कम्पनीले जिम्मेवार प्रयोग सुनिश्चित गर्न नसके एनभिडियाको मूल्य घट्ने उनको भनाइ थियो।
