काठमाडौं, ५ सेप्टेम्बर २०२६ — नेपालस्थित अमेरिकी दूतावासले प्राकृतिक प्रकोपको जोखिमलाई ध्यानमा राख्दै नेपालका लागि नयाँ यात्रा चेतावनी जारी गरेको छ। दूतावासले नेपाललाई ‘लेभल २’ अर्थात् ‘थप सतर्कता अपनाउनुहोस्’ श्रेणीमा राखेको छ।
दूतावासले रसुवाको रसुवागढी–टिमुरे–स्याफ्रुबेँसी क्षेत्र तथा नेपाल–चीन सीमा नाका क्षेत्रलाई ‘लेभल ४’ अर्थात् ‘यात्रा नगर्नुहोस्’ श्रेणीमा राखेको छ।
सेप्टेम्बर ४ मा जारी गरिएको यात्रा चेतावनीमा अगस्ट २६ मा आएको ठूलो बाढी र पहिरोका कारण प्रभावित क्षेत्रमा यातायात तथा सञ्चार सेवा अझै गम्भीर रूपमा प्रभावित रहेको उल्लेख गरिएको छ।
दूतावासका अनुसार प्रभावित क्षेत्रमा जारी खोज तथा उद्धार, राहत र पुनःस्थापनाका कामका साथै थप पहिरो र भीषण बाढीको जोखिमका कारण खतरा कायम छ।
अमेरिकी नागरिकलाई भोटेकोशी, त्रिशूली र नारायणी नदी आसपासका क्षेत्र, नदी किनार, होचा भूभाग, क्षतिग्रस्त पुल तथा अस्थिर भिरालो क्षेत्रमा नजान आग्रह गरिएको छ।
