संविधानविपरीत अभिव्यक्ति नदिन देउवालाई प्रचण्डको चेतावनी

काठमाडौं, १८ अगस्ट २०२६ — नेपाली कम्युनिस्ट पार्टीका अध्यक्ष पुष्पकमल दाहाल ‘प्रचण्ड’ले पूर्वप्रधानमन्त्री तथा नेपाली कांग्रेसका नेता शेरबहादुर देउवालाई संविधानविपरीत अभिव्यक्ति नदिन चेतावनी दिएका छन्।

मंगलबार पार्टीको बागमती प्रदेश कमिटीको एकता बैठकलाई सम्बोधन गर्दै प्रचण्डले देउवाको पछिल्लो अभिव्यक्ति तथा नेपाली कांग्रेसको मूलधारविरोधी समूहको हालैको भेलाबाट गरिएका निर्णयप्रति आपत्ति जनाएका हुन्।

पूर्वप्रधानमन्त्री तथा नेपाली कांग्रेसका पूर्वसभापति देउवाले आइतबार मूलधारविरोधी समूहले आयोजना गरेको भेलाको समापनका क्रममा आफू “हिन्दु” भएको बताएका थिए। उक्त भेलाले हिन्दु धर्मका पक्षमा निर्णयसमेत गरेको थियो।

पार्टी नेता हिमाल शर्माका अनुसार प्रचण्डले देउवाको अभिव्यक्तिसँगै कांग्रेसको उक्त समूहले गरेको पाँचबुँदे निर्णयको प्रसंग उठाउँदै संविधानविपरीत गतिविधि तथा अभिव्यक्ति नदिन चेतावनी दिएका हुन्।

“संविधानको दायाँबायाँ लाग्नुभयो भने आफैं सिद्धिनुहुन्छ र देश पनि दुर्घटनामा जान्छ। आफैंले बनाएको संविधानविपरीत निर्णय र अभिव्यक्ति नदिनुहोस्,” शर्माले प्रचण्डलाई उद्धृत गर्दै बताए।

प्रचण्डले प्रधानमन्त्री बालेंद्र शाह नेतृत्वको वर्तमान सरकारमाथि पनि कडा आलोचना गरेका छन्। उनले वर्तमान सरकार संविधान, लोकतन्त्र र विद्यमान व्यवस्थाविरुद्ध अघि बढिरहेको आरोप लगाए।

सरकार गठन भएपछि अव्यवस्था र भ्रष्टाचार बढेको तथा सञ्चारमाध्यममाथि आक्रमण गरेर आवाज दबाउने काम भइरहेको आरोप पनि प्रचण्डले लगाए।

“आरएसपीको सरकार बनेपछि अव्यवस्था धेरै बढ्यो, आवश्यकताभन्दा बढी छुट दियौँ। भ्रष्टाचार बढ्यो, मिडियालाई चुप लगाइयो,” प्रचण्डले भने।

उनले वर्तमान अवस्थाविरुद्ध पार्टीले सडक आन्दोलन गर्नुपर्ने भन्दै कार्यकर्तालाई त्यसका लागि तयार रहन आह्वान गरे।

“अब यसको विरोधमा बोल्नुपर्छ, नत्र गणतन्त्रमाथि नै प्रहार हुन सक्छ। हामी छिट्टै आन्दोलनको आह्वान गर्छौं, सबैको सहयोग आवश्यक छ। तपाईंहरू सबै तयार रहनुहोस्,” उनले भने।