काठमाडौं, २५ अगस्ट २०२६ — नेपाल अल्पविकसित मुलुकको सूचीबाट स्तरोन्नति हुने तयारीमा रहेका बेला परराष्ट्रमन्त्री शिशिर खनालले नेपाल–अमेरिका सम्बन्धलाई परम्परागत विकास सहायतालाई मात्र केन्द्रमा राख्नेभन्दा लगानी, व्यापार, प्रविधि र उद्यमशीलतामा बढी केन्द्रित गर्नुपर्ने बताएका छन्।
अमेरिकी स्वतन्त्रताको २५०औँ वार्षिकोत्सवका अवसरमा सेन्टर फर सोसल इनोभेसन एन्ड फरेन पोलिसी (सेसिफ) ले मंगलबार काठमाडौंमा आयोजना गरेको कार्यक्रममा बोल्दै खनालले नेपालको बदलिँदो आर्थिक अवस्थाअनुसार द्विपक्षीय सहकार्यको आधारसमेत परिवर्तन गर्नुपर्ने बताएका हुन्।
नेपाल सहायता-निर्भर आर्थिक मोडलबाट निजी क्षेत्रको सहभागिता, प्रत्यक्ष वैदेशिक लगानी र उच्च मूल्य अभिवृद्धि हुने व्यापारतर्फ अघि बढिरहेको उल्लेख गर्दै खनालले अमेरिकासँगको सम्बन्ध पनि सोहीअनुसार विकसित हुनुपर्ने बताए।
उनले नेपाल–अमेरिका सहकार्य विस्तार गर्न ३ वटा प्रमुख क्षेत्र औँल्याए। नेपालका युवा सूचना प्रविधि जनशक्तिलाई अमेरिकी पुँजी र नवप्रवर्तनसँग जोड्ने, स्वच्छ ऊर्जा तथा जलवायु उत्थानशीलतामा सहकार्य बढाउने र अमेरिकामा रहेका नेपाली समुदायको ज्ञान, सञ्जाल तथा लगानी क्षमतालाई नेपालको विकासमा उपयोग गर्ने विषयलाई उनले प्राथमिकतामा राखे।
नेपाल र अमेरिकाबीच आगामी वर्ष कूटनीतिक सम्बन्ध स्थापना भएको ८० वर्ष पुग्ने उल्लेख गर्दै खनालले दुई देशको सम्बन्ध लोकतान्त्रिक मूल्य, पारस्परिक सम्मान र जनस्तरको बलियो सम्बन्धमा आधारित रहेको बताए। उनले जनस्वास्थ्य, शिक्षा, पुनर्निर्माण र पूर्वाधारलगायत क्षेत्रमा अमेरिकाले लामो समयदेखि गर्दै आएको सहयोगको समेत प्रशंसा गरे।
