रसुवा, २६ अगस्ट २०२६ — बुधबार बिहान रसुवामा भोटेकोसी नदीमा आएको आकस्मिक बाढीपछि २९१ जना विदेशी र ९३ जना नेपालीसहित ३८४ जना यात्रु सम्पर्कविहीन रहेको नेपाल पर्यटन बोर्डले जनाएको छ।
१० वटा पर्यटन तथा ट्राभल एजेन्सीबाट प्राप्त विवरणका आधारमा प्रारम्भिक सूची तयार गरिएको हो। पर्यटन बोर्ड, पर्यटक प्रहरी तथा पर्यटन क्षेत्रका सरोकारवाला निकायले सम्बन्धित ट्राभल एजेन्सी, गाइड, स्थानीय प्रशासन र सुरक्षा निकायसँग समन्वय गरी सूचीमा रहेका यात्रुको अवस्था र स्थानबारे जानकारी संकलन तथा प्रमाणीकरण गरिरहेका छन्।
प्रारम्भिक सूचीमा रहेका २९१ विदेशी नागरिकमध्ये भारतका १०५ जना छन्। अन्य यात्रुहरूमा अस्ट्रेलिया, नेदरल्यान्ड्स, अमेरिका, मलेसिया, बेलायत र दक्षिण अफ्रिकाका नागरिक छन्। केही विदेशी यात्रुको राष्ट्रियता अझै पुष्टि हुन बाँकी छ भने ३७ जना गैरआवासीय भारतीय (एनआरआई) रहेको उल्लेख छ।
एजेन्सीगत विवरणअनुसार ट्रेकर्स सोसाइटीसँग सम्बन्धित ९२ जना, सम्राट टुर्स एन्ड ट्राभल्सका ७१ जना, लिफ होलिडेका ५५ जना, हिमालयन ग्लेसियरका ५२ जना, कैलाश जर्नीका ३१ जना, फिस्टेल टुर्स एन्ड ट्राभल्सका २७ जना, अल्पाइन इको ट्रेकका २० जना, काठमाडौं होलिडे टुर्स एन्ड ट्राभल्सका १७ जना, रिचा टुर्स एन्ड ट्राभल्सका १२ जना र एक्सप्लोर भ्याकेसनका ७ जना रहेका छन्।
पर्यटन बोर्डले उक्त सूची प्रारम्भिक मात्र भएकाले प्रमाणीकरणपछि विवरण परिवर्तन हुन सक्ने जनाएको छ। प्रमाणीकरण प्रक्रिया पूरा नभएसम्म यात्रु तथा उनीहरूका परिवारले सूचीका आधारमा कसैको अवस्था वा सुरक्षाबारे निष्कर्ष ननिकाल्न बोर्डले आग्रह गरेको छ।
