काठमाडौं, अक्टोबर १३, २०२६ — नेपाल दूरसञ्चार प्राधिकरण (एनटीए) ले स्वीकृत सेवा मापदण्ड र अनुमतिपत्रका सर्त उल्लङ्घन गरेको पाइएपछि १४ इन्टरनेट सेवा प्रदायकलाई जनही ५० हजार रुपैयाँ जरिवाना गरेको छ।
प्राधिकरणले जारी गरेको प्रेस विज्ञप्तिअनुसार निरीक्षण तथा अनुसन्धान प्रतिवेदनले अनुमतिपत्रका सर्त उल्लङ्घन भएको पुष्टि गरेपछि दूरसञ्चार ऐन, २०५३ को दफा ४७(१) बमोजिम जरिवाना गर्ने निर्णय गरिएको हो।
प्राधिकरणका प्रवक्ता मिनप्रसाद अर्यालका अनुसार स्वीकृत प्याकेजअनुसार सेवा उपलब्ध नगराएको, ग्राहकबाट तोकिएभन्दा बढी शुल्क लिएको, स्वीकृतभन्दा फरक प्याकेज बिक्री गरेको र त्यस्ता प्याकेजबारे ग्राहकलाई समयमै जानकारी नदिएको पाइएपछि सेवा प्रदायकमाथि कारबाही गरिएको हो।
अर्यालले यस्ता अनैतिक अभ्यास नियन्त्रण गर्न प्राधिकरणले कारबाही अघि बढाएको बताए।
प्राधिकरणका अनुसार दूरसञ्चार सेवा प्रदायकले महसुल निर्धारणसम्बन्धी निर्देशिकाबमोजिम प्रस्तावित शुल्क र लागू हुने मिति कम्तीमा तीन महिना अगावै स्वीकृतिका लागि पेस गर्नुपर्छ। तर, केही सेवा प्रदायकले यो व्यवस्था पालना नगरेको पाइएको प्राधिकरणले जनाएको छ।
