काठमाडौं, २१ अगस्ट २०२६ — दुग्ध विकास संस्थान (डीडीसी) ले दुबईमा घिउ निर्यात सुरु गरेको छ। रतो र चन्द्र–सूर्य इन्टरनेसनल प्रालिसँग भएको सम्झौताअनुसार डीडीसीले शुक्रबार पहिलो चरणमा ६०० किलो घिउ दुबई पठाएको हो।
सम्झौताअनुसार प्रत्येक वर्ष कम्तीमा ५० हजार किलो घिउ निर्यात गर्ने लक्ष्य राखिएको छ। दुबईको बजारमा माग र उपभोक्ताको प्रतिक्रिया बुझ्न प्रारम्भिक रूपमा ६०० किलो घिउ पठाइएको कम्पनीले जनाएको छ।
रतो र चन्द्र–सूर्य इन्टरनेसनलका प्रबन्ध निर्देशक प्रकाशचन्द्र घिमिरेका अनुसार कम्पनीले आफ्नो सहायक कम्पनी मातृभूमि जनरल ट्रेडिङ एलएलसीमार्फत दुबईमा डिपार्टमेन्ट स्टोर सञ्चालन गर्ने तयारी गरेको छ। त्यही स्टोरबाट डीडीसीको घिउ बिक्री गरिनेछ।
बजारबाट प्राप्त प्रतिक्रियाका आधारमा थप परिमाणमा घिउ खरिद गरी निर्यात गरिने घिमिरेले बताए।
दुबईमा घिउ पठाएसँगै डीडीसीले नयाँ अन्तर्राष्ट्रिय बजारमा प्रवेश गरेको छ। कम्पनीले यसअघि निर्यात गर्दै आएका बजारबाहेक पश्चिम एसियाका अन्य बजारमा समेत घिउको पहुँच विस्तार गर्ने लक्ष्य राखेको छ।
