अपराजित लुम्बिनी लायन्ससँग आज काठमाडौं गोर्खाजको प्रतिस्पर्धा

काठमाडौँ, नोभेम्बर ७, २०२६ — नेपाल प्रिमियर लिग (एनपीएल) अन्तर्गत आज शनिबार साविक विजेता लुम्बिनी लायन्स र काठमाडौं गोर्खाजबीच प्रतिस्पर्धा हुँदैछ। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा हुने खेल साँझ ५ बजे सुरु हुनेछ।

एनपीएलको १८औँ खेलमा तालिकाको शीर्ष स्थानमा रहेको लुम्बिनी र पछिल्ला खेलमा लय समातेको काठमाडौं आमनेसामने हुन लागेका हुन्।

लुम्बिनी लायन्सले प्रतियोगितामा अहिलेसम्म खेलेका चार खेलमा अपराजित रहँदै सात अंक जोडेको छ। तीन खेलमा जित हासिल गरेको लुम्बिनीले एक खेलमा अंक बाँडेको थियो। टोली अहिले अंकतालिकाको शीर्ष स्थानमा छ। प्लेअफमा स्थान सुरक्षित गर्ने लक्ष्यसहित लुम्बिनी आज पनि आफ्नो अपराजित यात्रा कायम राख्न चाहन्छ।

यता काठमाडौं गोर्खाज चार अंकसहित तालिकाको चौथो स्थानमा छ। तीन खेल खेलेको काठमाडौंले दुईमा जित र एकमा हार बेहोरेको छ। सुरुवाती खेलमा पराजित भएपछि टोलीले लगातार दुई खेल जित्दै पुनरागमन गरेको छ।

काठमाडौंले नोभेम्बर ५ मा भएको पछिल्लो खेलमा विराटनगर किङ्सलाई नौ विकेटले पराजित गरेको थियो। उक्त खेलमा विराटनगरलाई ८३ रनमै समेटेको काठमाडौंले ९.४ ओभरमा एक विकेट गुमाएर लक्ष्य पूरा गरेको थियो।

लुम्बिनी पनि पछिल्ला दुई खेलमा लगातार जित निकाल्दै मैदान उत्रँदैछ। उसले नोभेम्बर ३ मा पोखरा एभेन्जर्सलाई आठ विकेटले हराएको थियो भने नोभेम्बर ५ मा जनकपुर बोल्ट्सलाई १६ रनले पराजित गरेको थियो।