काठमाडौं, २५ अगस्ट २०२६ — प्रधानमन्त्री बालेन्द्र शाहले बुधबार प्रतिनिधिसभामा हुने प्रत्यक्ष प्रश्नोत्तर कार्यक्रममा कालो चस्मा लगाएर सहभागी हुन अनुमति माग्दै संघीय संसद् सचिवालयमा स्वास्थ्यसम्बन्धी प्रतिवेदन बुझाएका छन्।
प्रतिनिधिसभाका सभामुख डोलप्रसाद अर्यालले संसद् बैठकभित्र रंगीन वा कालो चस्मा लगाउन चाहने सांसद तथा मन्त्रीले त्यसका लागि वैध स्वास्थ्यसम्बन्धी प्रमाण पेस गर्नुपर्ने व्यवस्था गरेपछि प्रधानमन्त्री शाहले मेडिकल रिपोर्ट बुझाएका हुन्।
छाउनीस्थित सैनिक अस्पतालले जारी गरेको स्वास्थ्य प्रतिवेदनअनुसार शाहको आँखाको परीक्षण गर्दा प्रकाशप्रति संवेदनशीलता र आँखामा सुख्खापन देखिएको छ। चिकित्सकले नियमित रूपमा आँखामा औषधि हाल्न तथा सुरक्षाका लागि कालो चस्मा प्रयोग गर्न सुझाव दिएका छन्।
स्वास्थ्य प्रतिवेदन पेस गरेपछि प्रधानमन्त्री शाहलाई बुधबारको संसद् बैठकमा कालो चस्मा लगाएर सहभागी हुन अनुमति मिल्ने अपेक्षा गरिएको छ।
प्रतिनिधिसभा नियमावलीको नियम ५६ अन्तर्गत बुधबार हुने प्रत्यक्ष प्रश्नोत्तर कार्यक्रममा प्रधानमन्त्री शाहले सांसदका प्रश्नको जवाफ दिनेछन्। प्रत्यक्ष प्रसारण हुने उक्त कार्यक्रममा ११ जना सांसदले प्रधानमन्त्रीलाई प्रत्यक्ष प्रश्न गर्ने तय भएको छ।
