काठमाडौं, २५ अगस्ट २०२६ — न्युजिल्यान्डका अलराउन्डर जिम्मी निसम तेस्रो संस्करणको नेपाल प्रिमियर लिग (एनपीएल) का लागि जनकपुर बोल्ट्समा फर्किएका छन्। जनकपुरले मंगलबार सामाजिक सञ्जालमार्फत ३५ वर्षीय निसमलाई आगामी सिजनका लागि पुनः अनुबन्ध गरेको जनाएको हो।
निसमले सन् २०२४ मा भएको पहिलो एनपीएलमा जनकपुरलाई उपाधि दिलाउन महत्वपूर्ण भूमिका खेलेका थिए। उनले नौ खेलमा २४७ रन बनाएका थिए। उनको स्ट्राइक रेट १९६.०३ र ब्याटिङ औसत ३५.२९ थियो। उनले बलिङतर्फ सात विकेटसमेत लिएका थिए। प्रतियोगितामा सबैभन्दा उच्च स्ट्राइक रेटमा रन बनाएका कारण उनले ‘बेस्ट स्ट्राइक रेट’ अवार्ड जितेका थिए।
जनकपुर बोल्ट्सका प्रमुख कार्यकारी अधिकृत निरोज खतिवडाले निसमको टोलीसँगको सम्बन्ध मैदानमा मात्र सीमित नरहेको बताएका छन्। उनका अनुसार निसमले समर्थकको मनमा पनि विशेष स्थान बनाएका छन् र पहिलो सिजनमा टोलीलाई च्याम्पियन बनाउन भूमिका खेलेका निसम फेरि जनकपुर फर्किनु विशेष भएको छ।
दोस्रो एनपीएल सिजनमा जनकपुरसँग क्याप खेलाडीको कोटा उपलब्ध नभएपछि निसम पोखरा एभेन्जर्समा आबद्ध भएका थिए। उनले पोखराबाट चार खेल खेल्दै एक अर्धशतकसहित ९९ रन बनाउनुका साथै पाँच विकेट लिएका थिए।
यसपटक भने निसम टेस्ट श्रेणीको विदेशी खेलाडी कोटाअन्तर्गत जनकपुरबाट खेल्नेछन्।
