अमेरिकन आइडलका रनरअप अर्थर गन डिसेम्बर ५ मा काठमाडौंमा प्रस्तुत हुँदै

काठमाडौं, नोभेम्बर ९, २०२६ — अमेरिकन आइडलका उपविजेता नेपाली मूलका गायक दिवेश पोखरेल अर्थात् अर्थर गन चार वर्षपछि पुनः काठमाडौंमा सांगीतिक प्रस्तुति दिन आउने भएका छन्। उनी आगामी डिसेम्बर ५ मा राजधानीमा आयोजना हुने कार्यक्रममा प्रस्तुत हुनेछन्।

‘अर्थर गन लाइभ इन नेपाल’ नाम दिइएको कन्सर्ट शनिबार काठमाडौंको ठमेलस्थित क्लब नोभामा आयोजना हुनेछ। खल्तीको कार्यक्रम सूचीअनुसार साँझ ७ बजेदेखि सुरु हुने कन्सर्टका टिकट मूल्य ७९९ रुपैयाँदेखि १ हजार ४९९ रुपैयाँसम्म निर्धारण गरिएको छ। टिकट खल्तीको कार्यक्रम प्लेटफर्ममार्फत उपलब्ध छन्।

काठमाडौंमा जन्मिएका र हुर्किएका दिवेश पोखरेल सन् २०२० मा अमेरिकी गायन प्रतियोगिता ‘अमेरिकन आइडल’को १८औँ सिजनमा सहभागी भएपछि अन्तर्राष्ट्रिय रूपमा चर्चित बनेका थिए। अर्थर गन नामबाट प्रतिस्पर्धा गरेका उनले अडिसनमा बब डिलनको ‘गर्ल फ्रम द नर्थ कन्ट्री’ र क्रिडेन्स क्लियरवाटर रिभाइभलको ‘ह्याभ यु एभर सिन द रेन’ गाएर निर्णायकहरूको ध्यान खिचेका थिए।

उनको प्रस्तुतिले उनलाई प्रतियोगिताको फाइनलसम्म पुर्‍याएको थियो। अन्तिम प्रतिस्पर्धामा उनी जस्ट सामपछि दोस्रो स्थानमा रहँदै उपविजेता बनेका थिए।