काठमाडौं, अक्टोबर ३, २०२६ — नेपालमा गत साता सुनको मूल्य प्रतितोला ३ हजार ८०० रुपैयाँले घटेको नेपाल सुनचाँदी व्यवसायी महासंघ (फेनिगोसिडा) ले जनाएको छ।
अघिल्लो साताको कारोबार बन्द हुँदा प्रतितोला २ लाख ९८ हजार ६०० रुपैयाँ रहेको सुनको मूल्य गत साताको अन्त्यमा घटेर २ लाख ९४ हजार ८०० रुपैयाँ कायम भएको थियो।
साताभर सुनको मूल्य तीन दिन बढेको थियो। बुधबार सबैभन्दा धेरै प्रतितोला २ हजार ८०० रुपैयाँले मूल्य बढेको थियो। आइतबार भने सबैभन्दा ठूलो गिरावट देखिँदै सुनको मूल्य प्रतितोला ५ हजार रुपैयाँले घटेको थियो।
रोयटर्सका अनुसार गत साता अन्तर्राष्ट्रिय बजारमा सुनको मूल्य घटेको थियो। विश्वव्यापी ऋण लागत र सम्पत्तिको मूल्य निर्धारणका लागि मानक मानिने १० वर्षे अमेरिकी ट्रेजरी बन्डको प्रतिफल सन् २००२ यताकै उच्च स्तरमा पुगेपछि सुनको मूल्यमा दबाब परेको हो।
रोयटर्सले उद्धृत गरेको भनाइमा, “प्रतिफल नदिने सम्पत्तिका लागि अन्य अवस्था समान रहँदा यो चुनौतीपूर्ण हुन्छ, किनकि लगानीकर्ताको पोर्टफोलियोमा सुनले उक्त प्रतिफल स्तरसँग प्रतिस्पर्धा गर्नुपर्छ।”
