काठमाडौं, २६ अगस्ट २०२६ — भोटेकोशी नदीमा आएको बाढीबाट प्रभावित क्षेत्रमा सञ्चालित जलविद्युत् कम्पनीका शेयरमा बिक्री चाप बढेपछि नेपाल स्टक एक्सचेन्ज (नेप्से) परिसूचक बुधबार ३५.९२ अंकले घटेर २,५५८.३५ विन्दुमा बन्द भएको छ।
बाढी प्रभावित क्षेत्रमा सञ्चालित जलविद्युत् कम्पनीको शेयरमा उल्लेख्य गिरावट देखिएको छ। रसुवागढी हाइड्रोपावर कम्पनीको शेयर मूल्य १५ प्रतिशतले घटेर नकारात्मक सर्किट लागेको छ।
त्यस्तै, मोलुङ खोला हाइड्रोपावर कम्पनीको शेयर मूल्य १४.९९ प्रतिशत, त्रिशूली हाइड्रोपावर कम्पनीको १२.९५ प्रतिशत, मध्य मेवा खोला हाइड्रोपावरको ११.५६ प्रतिशत र सान्जेन हाइड्रोपावर कम्पनीको ११.१८ प्रतिशतले घटेको छ।
नेप्से परिसूचकमा ठूलो गिरावट आए पनि कारोबार रकम भने बढेको छ। बुधबार ४ अर्ब ७७ करोड ३० लाख रुपैयाँ बराबरको शेयर कारोबार भएको छ। मंगलबार ४ अर्ब १० करोड ९० लाख रुपैयाँको कारोबार भएको थियो।
समग्र बजार घटे पनि सर्वोत्तम पेन्ट्सको शेयर मूल्य भने बढेको छ। कम्पनीको शेयर मूल्य सकारात्मक सर्किटमा पुगेको छ।
