काठमाडौं, अक्टोबर ८, २०२६ — नेपाल प्रहरीको केन्द्रीय अनुसन्धान ब्युरो (सीआईबी) ले आर्थिक अनियमितता तथा म्याच फिक्सिङसम्बन्धी अनुसन्धान पूरा गर्दै अखिल नेपाल फुटबल संघ (एन्फा) का चार अधिकारीविरुद्ध मुद्दा चलाउन सिफारिस गरेको छ।
अनुसन्धानका क्रममा ६५ लाख ५० हजार रुपैयाँभन्दा बढीको अनियमितता भएको देखिएको सीआईबीले जनाएको छ।
सीआईबीले बुधबार अनुसन्धान प्रतिवेदन महान्यायाधिवक्ताको कार्यालयमा बुझाउँदै एन्फा अध्यक्ष पंकजविक्रम नेम्वाङ, महासचिव किरण राई, कोषाध्यक्ष रविन्द्र जोशी र लेखापाल सञ्जीव पाण्डेलाई प्रतिवादी बनाएर मुद्दा चलाउन सिफारिस गरेको हो।
सीआईबीका प्रवक्ता अनुपमशमशेर जबरा राणाका अनुसार अनुसन्धानका क्रममा प्राप्त प्रमाण तथा कागजातको अध्ययनबाट अनियमितता देखिएपछि मुद्दा चलाउन सिफारिस गरिएको हो।
“अनुसन्धानका क्रममा प्राप्त प्रमाण र कागजातको अध्ययन गर्दा ६५ लाख ५० हजार रुपैयाँको अनियमितता देखिएको छ। सोही आधारमा उहाँहरूलाई प्रतिवादी बनाएर मुद्दा चलाउन सिफारिस गरिएको हो,” राणाले राष्ट्रिय समाचार समिति (रासस) लाई बताए।
