काठमाडौं, ९ सेप्टेम्बर २०२६ — राष्ट्रिय स्वतन्त्र पार्टी (रास्वपा) का सभापति रवि लामिछानेले रसुवामा आएको विनाशकारी भोटेकोशी बाढीको कारण, क्षति तथा अन्तर्राष्ट्रियस्तरमा उठाउनुपर्ने विषयबारे अध्ययन गर्न सर्वदलीय संसदीय विशेष समिति गठन गर्न प्रस्ताव गर्दै विपद् प्रभावित नागरिकलाई होच्याउने वा साइबर बुलिङ गर्ने कार्य नगर्न पार्टी सदस्यलाई चेतावनी दिएका छन्।
बुधबार प्रतिनिधि सभाको बैठकमा विशेष समय लिएर बोल्दै लामिछानेले हालको बाढीलाई राष्ट्रिय महत्वको जलवायुजन्य विपद्का रूपमा घोषणा गर्न पनि माग गरे।
‘अहिलेको बाढीलाई राष्ट्रिय महत्वको जलवायुजन्य विपत्तिको घोषणा गरौँ,’ लामिछानेले भने, ‘यस विपत्तिको कारण, क्षति तथा यसको अन्तर्राष्ट्रियकरणका लागि सर्वदलीय संसदीय विशेष समिति गठन गरौँ।’
लामिछानेले भोटेकोशी–त्रिशूली क्षेत्रमा बाढीपछि खोज तथा उद्धार कार्य अझै जारी रहेको बताउँदै सम्पर्कविहीन व्यक्तिहरूको खोजीबाट आशा नत्याग्न आग्रह गरे।
‘उद्धार कार्य अझै जारी छ। राम्रो खबर आउने आशा हामीले छाडेका छैनौँ,’ उनले भने। बेपत्ता व्यक्तिलाई जीवितै उद्धार गर्न सकिने सम्भावना रहेसम्म खोजी कार्य रोक्न नहुने उनको भनाइ थियो।
