थिम्फु, भुटान, १४ अगस्ट २०२६ — भुटान र नेपालका कलाकारलाई एकसाथ प्रस्तुत गर्ने आगामी भुटानी सर्वाइभल हरर फिल्म टनेल २६ ले हिमालमुनि रहेको अँध्यारो सुरुङभित्रको भयावह कथा दर्शकमाझ ल्याउने तयारी गरेको छ।
फिल्ममा संगाय छेल्ट्रिम, अनुपविक्रम शाही, आना शर्मा, रोशिनी दादा, निदुप दोर्जी र फुन्छोक धोन्डेन मुख्य भूमिकामा छन्। फिल्मको निर्माण संगाय छेल्ट्रिम फिल्म्स, पिक XV स्टुडियो र दोर्जिग्स प्रोडक्सनले गरेका छन् भने अभिनेता प्रदीप खड्का क्रिएटिभ प्रोड्युसरका रूपमा जोडिएका छन्।
फिल्मको कथा पहाडमुनि रहेको गहिरो सुरुङभित्र फसेका केही बाँचेकाहरूको वरिपरि घुम्छ। उनीहरू अँध्यारो र कठिन परिस्थितिबाट बाहिर निस्कने प्रयास गरिरहेका बेला सुरुङभित्र प्राचीन तथा गैरमानवीय श्राप वा जीव जागृत हुन्छ। त्यसपछि उनीहरूको अवस्था सामान्य दुर्घटनाबाट जीवनरक्षाका लागि संघर्षमा परिणत हुन्छ।
फिल्मको आधिकारिक टिजरले यसको भय, तनाव र सर्वाइभल केन्द्रित वातावरणको पहिलो झलक दिएको छ। टिजरमा साँघुरो सुरुङ, अँध्यारो वातावरण र रहस्यमय खतरालाई कथाको प्रमुख पक्षका रूपमा प्रस्तुत गरिएको छ।
टनेल २६ नेपाल–भुटानबीचको सहकार्यमा बनेको चलचित्रका रूपमा पनि चासोको विषय बनेको छ। आना शर्मा जनवरी २०२६ मा फिल्मको छायांकनका लागि भुटान पुगेकी थिइन्। त्यस क्रममा भुटानी अभिनेता संगाय छेल्ट्रिम र नेपाली अभिनेता अनुपविक्रम शाहीसँग उनको सहकार्य रहेको र भुटानका विभिन्न स्थानमा छायांकन भइरहेको बताइएको थियो।
